Wala pa sang identity ang lalaki nga ginluthang-patay sa Purok Zone 1, Barangay Handumanan, ciudad sang Bacolod, kahapon, kapin alas-5:10 sang hapon.
Sa interview sang Bombo Radyo kay Police Captain Glenn Montaño, station commander sang Bacolod Police Station 10, ang biktima nagasakay sa itom nga motorsiklo nga Honda TMX 125 kag ini ang nagbakal sang sud-an.
Samtang nagabyahe, siya ang ginasundan sang suspek nga nagasakay sa pula nga motorsiklo.
Paglab-ot sa area kun diin natabo ang insidente, nag-untat ang biktima bangod may gin-esturya ini sa cellphone.
Nagpalapit ang suspek kun sa diin ginbuggo sini ang iya motorsiklo sa motor man sang biktima.
Natumba ang motorsiklo sang biktima kag nagluhod pa ini sa atubang sang suspek kag naghambal nga ‘Kas indi ko pagtiroha may ginasagod ko nga bata’ apang naghambal ang suspek nga ‘wala ko labot bisan ano da ang imo problema’ kag siya ang gintiro sang duha ka beses.
Nahimo pa sang biktima makadalagan kag nagpadulong sa hilamonan.
Ginsobsob sang biktima ang iya ulo sa duta kag siya ang ginsundan sang suspek kag liwat nga ginluthang.
Suno kay Montaño, may isa ka menor de edad nga naka-witness sa natabo kag nakita sini nga ang suspek nagasuksok sang hood, naka-face mask kag naka-sunglasses kun sa diin nadagdag pa ang facemask sini sang gintiro niya ang biktima.
Ang biktima nagasuksok sang itom nga tshirt, itom nga short kag nakahelmet pa sang narekober ang iya bangkay.
Nakuha man sa tupad sang lawas sang biktima ang kapin sa pulo ka kilo sang bugas, kag tatlo ka butane gas cannister.
Sa karun, padayon pa ang imbestigasyon sa pagtumod sa suspek kag motibo sa pagluthang.
