BACOLOD CITY – Nagbubo ang pagpanginbulahan para sa Mutya ng Taguig 2012 matapos ini ginkasal sa alkalde sang Murcia, Negros Occidental.
Sanday Charmaine Hernandez kag Mayor Andrew Montelibano ang nagbayluhanay sang “I Do’s” sa isa ka simbahan sa banwa sang Murcia, Sabado nga adlaw.
Nagtambong ang pila ka incumbent kag ex-officials sang gobyerno sa ginakabig nga “wedding of the year” sa Negros Occidental.
Kalakip na diri sanday anay Vice President Jejomar Binay kag presidential spokesperson Harry Roque nga nagserbe nga maninoy, kag Senator Nancy Binay nga isa man sa mga maninay.
Nasiplatan man sa mga bisita ang Negrense boxer nga si Donnie “Ahas” Nietes nga bag-o lang nakabalik nagikan sa madinalag-on nga hampang sa California, USA kun sa diin nadepensahan sini ang iya IBF light flyweight title.
Nagtambong man ang anay chairman sang Government Service Insurance System nga si Daniel Lacson kag iban pa nga opisyal sang Negros Occidental.
Ang 23-anyos nga Taguig beauty queen ang isa ka accountant kag isa man sa mga kandidata sa Miss Earth Philippines 2013.
Isa man ini sa tiglawas sang Pilipinas sa Miss ASEAN Friendship 2017 nga ginpatigayon sa Vietnam.
Samtang, ang 43-anyos nga si Montelibano ang anak sang isa ka prominente nga pamilya sa Negros Occidental kag last-termer nga alkalde sang banwa sang Murcia.
Ang bridal gown ni Hernandez ang gindisenyo sang kilala nga designer nga si John John Ditching II nga amo man ang naghimo sang gown sang Miss Indonesia sa 2016 Miss Universe.
