Ginpahayag sang abogado sa ciudad sang Bacolod nga mas maayo nga ginfile na sa Regional Trial Court ang mga kaso angot sa drug war killings sangsa idangop pa sa International Criminal Court.
Sa interview sang Bombo Radyo Bacolod kay Political Analyst Atty Jomax Ortiz, kun nakita nga may nabayolar sa drug war operations ukon sala ang pagserbe sang search warrant ukon warrant of arrest, dapat nga deretso na nga ifile ang kaso sa Regional Trial Court.
Suno diri sa pagfile sang kaso, ang akusado ang irequire nga magsumitter sang counter affidavit kag ini ang dapat madasig nga maresolbar kaangay sa pagfile sang kaso ni Pastor Apollo Quiboloy nga binulan lang nakapagwa gilayon sang Warrant of Arrest.
Suno kay Ortiz, nakadepende sa ipresentar nga ebidensya kag sa paglantaw sang piskal kun ang kaso ang ibasura ukon magpagwa sang warrant of arrest.
Apang aminado ini nga ang manabat amo ang mga kapulisan nga imbulbado apisar pa nagpahayag si former President Rodrigo Duterte nga gina-ako sini ang tanan nga responsibilidad.
Ini bangod ang kapulisan amo ang nag-implementar kag nakahimo sang krimen.
Sa pihak nga bahin kun sa ICC ifile ang kaso, ini ang magadangat pa sang tinuig bangod sila ang wala man sang implementing power kag wala sang arresting officer.
Sa baylo, ang ICC ang makig-angot pa sa gobyerno, magarequest sa Department of Justice kasubong man sa Office of the President, antes ma-implementar ang warrant of arrest.
Panindugan sang abogado nga dugang nalang nga remedy ang pagdangop sa ICC.
