Gindismiss sang city prosecutor’s office ang kaso nga ginpasaka sang San Enrique Municipal Police Station batok sa isa ka 56-anyos nga construction worker nga nadakpan sang isa ka kagawad nga nagabitbit sang envelope nga may unod kwarta kag sample ballot sa Barangay Tibsoc, San Enrique sang Mayo 8.
Sa interview sang Bombo Radyo kay Police Major Bonifacio Aral, hepe sang San Enrique Municipal Police Station, ginpahayag sini nga nadakpan ni Barangay Kagaward Juno Benitez si Dindo Tolosa, 56 anyos, isa ka construction worker kag residente sang Barangay Poblacion sa nasambit nga banwa, kaupod ang iya menor-de-edad nga bata sakay sa tricycle kag may bitbit nga envelope nga may unod nga P2,100 kag shaded sample ballot.
Suno kay Aral, ginpahayag ni Tolosa nga ginsugo lamang siya nga idul-ong ang envelope.
Ginhunong sa San Enrique Municipal Police Station si Tolosa kag ila ginpasakaan sang kaso apang suno diri, gindismiss ini sang city prosecutors office bangud makabig nga indi consumated ang vote buying.
Suno sa iya, dapat makit-an gid nga ginadaho ukon may nagbaton sang kwarta agud ini ang makabig nga vote buying.
Sa karun ginrelease na ang suspetsado samtang exempted naman ang bata sini sa criminal liability.
