Ginhitso subong nga adlaw ang pagpasaka sang kaso batok sa lalaki nga nanaya kag nagpalupok sang armas luthang sa Hacienda San Antonio 2, Barangay Dos Hermanas, Talisay City, Negros Occidental.
Ang lalaki ang ginkilala nga si Jose Aluntaga Jr, Alyas Jojo ukon Alyas Cesar Castro, 68 anyos.
Ang konflikto ang nag-umpisa sa duta nga gina-agawan sang mga Comprehensive Agrarian Reform Program (CARP) Beneficiaries kag nagapakilala nga tag-iya sang propedad nga si Paul Chang.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, tatlo ka kaso ang ginpasaka batok kay Aluntaga nga amo ang grave threat, illegal discharge of firearms kag Republic Act (RA) 10591 ukon Comprehensive Firearms and Ammunition Regulation Act.
Suno diri, under probation pa si Aluntaga bangod sa grave threat kag paglapas sa RA 10591 kag bangod sa ginhimo sini na-nullified ang probation sini.
Sa pagpamangkot sang kapulisan, may yara sang pamilya si Aluntaga sa Talisay City apang madugay na nga wala sang komuniskasyon sa ila ang suspek.
Samtang, padayon pa man nga ginatun-an kun ang mga kaupod ni Aluntaga ang kabahin sang isa ka security agency ukon indi.
Mensahe ni Jocson sa mga blue guards nga ihatag ang maximum tolerance sa trabaho kag sa mga pumuluyo naman makig-angot sa kapulisan kun may yara sang reklamo sa nagakatabo sa area.
