Ginfile na sa Hall of Justice sa ciudad sang Bacolod ang kaso nga murder batok kay Patrolman Alvin Rios, ang pulis nga nagluthang sa kaangay sini nga pulis nga naabtan niya nga nagahublas samtang kaupod ang iya live in partner sa sulod sang ila nga kwarto.
Sa interview sang Bombo Radyo Bacolod kay Eugene Tolentino, station commander sang Bacolod Police Station 8, gintinguhaan nila nga makompleto ang mga kinahanglan nga dokumento kalakip na ang resulta sang ballistic kag paraffin test kasubong man sang autopsy examination sa bangkay ni Police Staff Sgt. Jotham Aremtuto.
Apang nakadepende sa paglantaw sang City Prosecutor kun muder gid man ukon panaugon sa homicide ang kaso.
Paathag ni Tolentino nga gintinguhaan nila nga matapos ang tanan nga requirement bangod subong man nga hapon matapos ang reglementary period kag kun indi mahingagaw, ini ang mahulog sa regular filing.
Ang nagfile sang complaint amo ang legal nga asawa sang napatay nga pulis.
