Ginahanda na sang mga katapo sang Bacolod City Drug Enforcement Unit ang mga papeles sa pagpasaka sang kaso batok sa mga drug personalities nga nadakpan sa drug buybust operation nga magkatuhay nga ginpatigayon sa ciudad sang Bacolod sang Sabado kag Domingo.
Madumduman sang Sabado sang gab-i dakop ang isa ka babayi kag lalaki sa drug buybust operation nga ginpatigayon sa Purok Mainuswagon, Brgy. Cabug, Bacolod City, kagab-i, Pebrero 23, 2025.
Ginkilala ang mga nagkaladakpan sanday Jhon Yulo alyas Bee nga ginakabig nga High Value Individual (HVI) kag Erika Suarez kag ginakabig nga Street Level Individual.
Nagdangat sa 125 grams sang suspected shabu kag may standard drug price nga P850,000.
Samtang sang Domingo kapin alas-4:00 sang kaagahon, nadakpan naman si Rodolfo Suelan, 50 anyos, residente sang Purok Santan Brgy. Taculing, Bacolod City sa ginpatigayon nga drug buy bust operation sa Prk. Riverside, Brgy. Banago, Bacolod City.
Nakumpiskar kay Suelan ang kapin sa 450 grams sang suspected shabu nga may market value nga P3,060,000.
Ang mga suspetsado nga nadakpan ang magapangatubang sang nagakaigo nga kaso.
Sa interview sang Bombo Radyo Bacolod kay Bacolod City Drug Enforcement Unit Head Police Lt. Col. Antonio Benitez, ang isa sa nadakpan sa Barangay Cabug ang may pending warrant of arrest sa illegal nga druga kun sa diin nakagwa apang nagbalik naman sa pagtransaction sa illegal nga druga kag ginserbe man ang pending warrant kun sa diin ini nadakpan.
Samtang ang nadakpan sa Barangay Banago ang imbulbado sa pagpanghold-up sa isa ka dako nga courier company sa ciudad.
Madugay naman ini nga ginamonitor bangud ini ang nagadaho sang supply sang illegal nga druga agud ipasulod sa ciudad.
Ang mga papelis sa pagpasaka sang kaso sa mga ini ang ginahitso na kag inote naman sang mga ini sa pagpasaka sang kaso ang mga pending cases sang mga drug personalities kag nakadepende na sa piskal kag sa korte ang pagdesisyon sini.
