Natapos na ang inquest proceedings para sa apat gikan sa lima nga mga naaresto nga katapo sang New People’s Army (NPA) sa Brgy Matab-ang, Talisay City, Negros Occidental
Sa interview sang Bombo Radyo Bacolod kay Police Lt Col Joem Malong, spokesperson sang Police Regional Office – Negros Island Region, ginfile na ang kaso nga illegal possession of firearms and explosives sa apat.
Madumduman nga naaresto sanday Glemmar Ruelis Bacusmo, 48 anyos, residente sang Prk Golden Shower, Brgy. Poblacion, Ipil, Zamboanga Sibugay; Danny Boy Pacheco, 34 anyos, residente sang Sitio Buli, Brgy. Bagonbon, San Carlos City; Judy Manayon Caramihan, 34 anyos kag Julie Ann Balora, 26 anyos, lunsay residente sang Brgy. Santa Rosa, Murcia; kag si Jerome Escamrosa Seballos, 57 anyos, residente sang Brgy. Bata, Bacolod City.
Ang mga ini ang ginalataw nga kaupod sa mga na-engkwentro sang 79th Infantry Battalion sa Brgy Salamanca, Toboso.
Ini bangod duha sa ila ang may mga samad, kag yara karun sa ospital.
Wala naman nalakip sa inisyal nga nakasuhan si Glemmar, nga subject sang ginserbe nga warrant of arrest.
Siya ang may nahibaluan 26 ka warrant of arrest sa bilog nga Negros Island Region.
Nahibaluan nga kasunod sang engkwentro sa Toboso, nagpatigayon man sang mga checkpoint operations ang mga kapulisan.
Ginapahayag nga sila ang nagasaylo-saylo sa ginakabig nga safe house, partikular na sa mga ginakabig nila nga white area ukon mga lugar nga madamo sang nagasuporta sa ila.
Padulong kuntani ang mga ini sa safe house sa Talisay City, apang may-ara sang pumuluyo nga nakakita sa ila kag ginreport sa kapulisan.
Sila ang nadakpan sa Circumferential Road, Brgy Matab-ang, Talisay City.
Nakuhaan ang mga ini sang mga armas kag granada.
Sa karun, ang duha ang nakaconfine sa ospital, ang duha ara sa CIDG detention facility; samtang si Julie Ann ang yara sa jail facility sang Talisay City Police Station bangod wala sang jail facility para sa babayi sa CIDG.
