Ginapanawagan sang Commission on Elections (Comelec) ang criminalization sang nuisance candidacy.
Ginpahayag ni Comelec chairman George Erwin Garcia, kun indi man mapriso ang mga ini dapat nga mahatagan ang mga nuisance candidate sang multa bilang penalidad.
Ini ang ginpahayag ni Garcia kasunod desisyon sang Korte Suprema nga pagpauntat sang disqualification sang senatorial aspirant Subair Guinthum Mustapha, anay Caloocan City Representative Edgar Erice, kag iban pa nga indibidwal sa May 2025 national kag local elections.
Ang desisyon ang nagtulod sa poll body nga suspendihon ang pag-imprenta sang mga opisyal nga balota apang 6 million sa mga ini ang nakumpleto na kag sa ulihi ginkabig nga indi na magamit.
Ginpahayag sang Comelec nga ang mga pangalan nga Marie Grace David, Mary Dominique Oñate kag Aldrin Sta. Ana ang sa karun malakip na sa official ballots sa pagpadayon sang pagprinta sang mga balota sa madason nga semana.
Si David ang nagapapili bilang bise alkalde sang Limay, Bataan; Oñate bilang alkalde sang Palompon, Leyte; kag Sta. Ana bilang alkalde sang Bocaue, Bulacan.
Nagpatuman na ang Comelec sang contingency measures kalakip na ang pag-amyenda sa database sang kandidato kag liwat nga pagschedule sang Trusted Build sang AES nga patigayunon subong nga adlaw, Enero 20 sa Palacio del Gobernador main office sa Intramuros, Manila.
Ang bag-o nga ballot templates ang igenerate kag iserialize sa Comelec warehouse sa Laguna Technopark Annex sa Biñan City sa Enero 21.
