Ginahanda na ang kaso nga infidelity in the custody of prisoners para sa desk officer kag jailer sang Bacolod City Police Station 3 matapos makapalagyo ang apat ka priso kahapon sang kaagahon.
Sa interview sang Bombo Radyo Bacolod kay Police Lieutenant Colonel Ariel Pico, spokesperson sang Bacolod City Police Office, ginpahayag sini nga detained na sa Bacolod City Police Station 3 ang desk officer nga si Police Corporal Orweyn Jade Nadado kag jailer nga si Police Staff Sergeant Eric Olverio para sa inquest proceedings, santo sa mando ni Bacolod City Police Office City Director Colonel Henry Biñas.
Ginkilala ang mga nakapalagyo kanday Sunny Capa kag Ely Lorence Sazon sang Purok Mahimulaton, Brgy. Banago, Bacolod City; Michael Peñoso sang Purok Sigay, Brgy. 2, Bacolod City; pareho nga nagapangatubang sang kaso nga paglapas sa Republic Act 9165 ukon Comprehensive Drugs Act of 2002; kag si Jeffrey Elangos, 38 anyos, kasado kag residente sang Purok Riverside, Brgy. Banago, Bacolod City nga nagapangatubang sang kaso nga paglapas sa Republic Act 7610 ukon Anti-Child Abuse Act.
Sa karun, padayon pa ang manhunt operation sa mga nakapalagyo.
Suno kay Pico, dako ang salabton ni Police Major Ruel Culanag bilang hepe kag magapangatubang ini sang kaso nga neglecting of command responsibility apang padayon pa ang imbestigasyon kag ginahulat pa ang paathag ni Pol. Major Culanag tuhoy diri.
Dako naman nga palamangkutanon sa opisyal kun paano nakapalagyo ang mga priso.
Nagpanawagan man ini sa mga nakapalagyo nga magsungka agud indi na madugangan ang mga kaso sini.
Dugang pa ni Pico, padayon man ang pagcoordinate nila sa Women and Children’s Protection Desk bangud ang isa sa nagpalagyo ang may kaso nga Child Abuse.
Madamo man nga government agencies ang sarang nga makadakop sa mga ini, indi lang ang kapulisan.
Nagpasalig man ini sa mga nakapalagyo nga wala sang may matabo sa ila kun magsungka sa mga kapulisan.
