Ginalauman nga maproseso na sa masunod nga semana ang pagpasaka sang kaso nga frustrated murder kag murder ang duha ka suspetsado nga nagluthang sa pamilya nga nagasakay sa top-down samtang nagabyahe sa Barangay Tangub sang tinalikdan nga Enero 21 sang gab-i.
Madumduman nga gintiro sang duha ka mga suspek ang mag-asawa nga sanday Danilo Importante kag Cindy Importante, kag ang sakay nga si Aira kag ang duha sini ka tuig nga anak nga gin-itsa pa sini sa kanal agud nga indi maigo sang bala.
Patay sa pagpangluthang si Danilo samtang nagarekober naman ang iya asawa nga nakagwa na sa ospital kag nakaluwas naman si Aira kag ang bata sini.
Ang duha ka mga suspetsado amo sanday, Juvanie Pelenio kag Jonald Sampilo.
Sa interview sang Bombo Radyo Bacolod kay Police Capt. Melvin Mercado, station commander sang Bacolod Police Station 8, napasaka na ang kaso nga 2 counts of murder batok sa duha ka mga suspetsado samtang ginalauman naman nga sa masunod nga semana mapasaka man ang kaso nga frustrated murder kag murder.
Suno diri, wala pa nadagdagan sang warrant of arrest ang mga suspek kag ini ang mga at large pa.
