Napasakaan na sang kaso nga homecide ang CAFGU member nga nagluthang patay sa mag-amay kag nakasamad sang duha ka iban pa sa Barangay Montilla, sa banwa sang Moises Padilla sang Martes.
Madumduman nga nagresponder si CAFGU Active Auxiliary (CAA) member Donan Sosia sa report sang nagamaoy nga hubog sa lugar kun sa diin nakomprontar sini ang may kaadlawan nga si John Albert Templatura, 32 anyos.
Naghunos sang binangon si John Albert kag hana nga labuon si Sosia gani iya ini gilayon gintiro sang M16 rifle sang makapila ka beses sa lawas.
Samtang nagpalapit naman sa iya ang hubog man sini nga amay nga si Godofredo Templatura, 70 anyos nga nakita man sa video nga wala sang ano man nga armas, apang ini ang gintiro man sang makapila ka beses sang CAFGU member.
Patay ang mag-amay samtang pilason naman sanday Marites Rafol, 49 anyos kag Jeisel Abaño, 34 anyos nga nasalabat sang bala.
Sa interview sang Bombo Radyo Bacolod kay Police Major Joevito Bose, hepe sa Moises Padilla Municipal Police Station, ginpahayag sini nga yara na sa kostudiya nila si Sosia kag nafile naman ang kaso nga homecide sa pagluthang sini sa amay nga Templatura.
Apang ginalantaw naman nga mahimo self defense ang sa pagluthang sini sa bata nga Templatura gani ini ang patigayunan pa sang preliminary investigation sang piskal.
Suno kay Bose, handa man nga magfile sang kaso nga frustrated murder ang duha ka babayi nga naulamid sa insidente apang wala pa ginbatun sang piskal bangod ginakinahanglan pa ang ila nga medical record.
Gani ginalantaw nga sa ila paggwa sa ospital, mafile naman ang dugang nga mga kaso batok sa CAFGU member.
