Natalana nga pasakaan sang kaso nga homicide paagi sa inquest proceedings ang nag-surrender nga ginatudlo nga suspect sa pagpatay sa 82-anyos nga lalaki sa Prk NEDF, Brgy Handumanan, Bacolod City matapos nga magsurrender, kahapon sang kaagahon.
Madumduman nga nasapwan sang construction worker nga wala na sang kabuhi kag duguon si Seigfredo Magalona sa sulod sang banyo sa iya ginapakay-o nga balay sang Biyernes.
Sa interview sang Bombo Radyo kay Police Cpt. Lelanie Lagoting, Station Commander sang Bacolod Police Station 10, alas-9:00 sang gab-i nagpadulong ang live-in partner sang suspect sa PS10 kag gin-abisohan nila nga ipasurrender ang suspect.
Suno kay Lagoting,paagi sa kooperasyon sang live-in partner, nag-surrender ang suspetsado sa Murcia Municipal Police Station matapos nga magpauli ini sa ila balay sa Barangay Salvacion, Murcia, Negros Occidental.
Suno sa station commander, nagaboard lamang ang suspect sa Bacolod bangud ang iya live-in partner ang nagatrabaho sa ciudad.
Ginkumpirmar man sini nga ang suspect amo ang nakita sa CCTV footage nga nagsulod sa balay sang biktima.
Suno kay Lagoting, mabatian sa CCTV footage nga ang biktima kag suspect ang nagabaisay antes natabo ang krimen.
Suno diri, ang suspect ang napriso na sang 2020 sa Pasay City Jail may kaangtanan sa illegal nga druga kag gambling.
Nakahunong ini sa karun sa Bacolod City Police Station 10 kag magapangatubang sang kaso nga homicide.
