Ginalantaw pa kun kaso nga homicide, robbery with homicide ukon murder ang ipasaka batok kay Constantino Canoy, ang person of interest sa pagpatay kay Police Corporal Nestor Madelo nga nasapwan nga wala na sang kabuhi sa higad sang dalan sa Bangga Acas, Barangay Pilar, Hinigaran, Negros Occidental, Domingo sang aga.
Sa interview sang Bombo Radyo kay Police Captain Ryan Villasario, hepe sang Hinigaran Municipal Police Station, ginpahayag sini nga yara sa gihapon sa ila kustodiya si Canoy kag ginatinguhaan nga mapasakaan sang kaso antes matapos ang reglementary period agud indi na siya makagwa.
Suno kay Villasario, tubtob sa karun, wala gihapon sang tul-id nga pahayag ang person of interest kag ginmislead sini ang imbestigasyon bangud apisar nga sa Barangay Sum-ag, Bacolod City nagluntad ang aksidente kun sa diin nabungguan sang carry nga ginamaneho ni Canoy ang truck sang tubo, ginpahayag sini nga ini ang natabo sa Bago City.
Nahibaluan man nga pagkatapos sang aksidente, nagpadulong sa sur nga bahin si Canoy kag ginbilin ang bangkay ni Madelo sa Hinigaran.
Suno sa hepe, gina-establish pa kun ano ang motibo ni Canoy kag ginalantaw man kun may motibo ini nga patyon ang biktima bangud pagkatapos sang aksidente, wala niya ini gindala sa ospital.
Wala man may gintuad si Canoy nga may nagluntad nga paglalisay sa tunga nila ni Madelo antes ang insidente.
Ginaestablish pa man ang kaso nga igapasaka batok diri santo sa mga natipon nga ebidensya.
