Pasakaan na sang kaso nga murder ang isa ka negosyante nga nagapanag-iya sang isa ka prutasan sa Corner Mabini, Rosario Street, Brgy. 33, Bacolod City.
Ini matapos ang insidente sang pagpangluthang kahapon sa nasambit nga lugar kun sa diin gintiro-patay sang negosyante nga ginkilala nga si alyas “Bongbong” ang isa ka lalaki nga nagatindog sa iya nga prutasan matapos nga masal-an niya ini nga nagapangawat.
Ang biktima ang ginkilala nga si alyas “Joevic”, residente sang Sitio Pulo, Brgy. Mambulac, Silay City.
Sa interview sang Bombo Radyo Bacolod kay Police Captain Peter John Ramos, Station Commander sang Police Station 6, nagapangape lamang si Joevic sa area apang sang pag-abot ni Bongbong, nasal-an niya si Joevic nga kawatan kag ginsita niya ini.
Nagbinaisay pa ang duha antes pa nga ginlampusan sang suspek sa ulo ang biktima kag gintiro sang makapila ka beses.
Suno kay Ramos, nakaagom ang biktima sang mga pilas sa nagkalain-lain nga bahin sa iya lawas nga nagresulta sang iya kamatayon.
Gindala pa sa ospital ang biktima apang gindeklarar ini nga dead on arrival.
Sa karon, at large pa ang suspek kag padayon nga ginapangita para atubangon ang iya kaso nga murder.
