Ginakonsiderar na nga case close ang pagluthang sang pulis sa iya kahagugma kag pag-utas sang kaugalingon nga kabuhi sa Purok Camia, Barangay Poblacion, Valladolid, Negros Occidental kagab-i.
Ang pulis ang ginkilala nga si Police Master Sgt Larry Junio, 40 anyos, residente sang Barangay Doldol, Valladolid apang assigned sa Iloilo City Police Station 5 sa Mandurriao, Iloilo City samtang ang babayi ang ginkilala nga si Maicah Redil, 33 anyos.
Si Junio ang may legal nga asawa kag bata, samtang si Redil ang may apat naman ka kabataan nga edad 13, 10, 6 sa iban nga lalaki samtang ang agot nga manug duha ka tuig ang bata nila nga duha ni Junio.
May nagluntad nga pagbaisay sa duha halin pa lamang sang alas-3:00 sang hapon tubtob nga nagdangat sa pagpangluthang sang pulis kay Redil sang madamo nga beses kag ini ang nag-utas man sang kaugalingon nga kabuhi sang tion nga ginanegotiate sang kapulisan.
Ang kaso ang makabig na nga sarado bangod lunsay napatay ang duha.
Ang krimen ang nawitness naman sang 10 anyos nga bata.
Si Junio ang anay assigned man sa Valladolid Municipal Police Station, apang nasuspender matapos ginpasakaan sang administrative charges bangod sa utang.
Sa interview sang Bombo Radyo Bacolod kay Police Captain Bonifacio Galvez Jr., deputy chief sang Valladolid Municipal Police Station, pahanumdom sini sa mga kapulisan nga kun may problema, indi gid magpadala sa init sang ulo.
Ini bangod wala gid sang maayo nga padulongan ang paghimo sang tikang nga tuga sang kaakig.
