Ginaproseso na ang pagpasaka sang kaso sa duha ka suspect sa pagluthang patay sa inkargado sa Hacienda San Isidro, Brgy Bagtic, Silay City sang Pebrero 14.
Madumduman nga papauli na kuntani gikan sa pagdul-ong sa iya bata nga manunudlo ang 63 anyos nga si Ricardo Grullo sang siya ang ginbantayan sang duha ka suspetsado.
Ang biktima ang nakaangkon sang walo ka igo sang bala ukon gin-ubos ang unod sang isa ka magazine sang cal. 45 pistol.
Ang mga suspect ang natumod sa narecover nga CCTV footage.
Sa interview sang Bombo Radyo Bacolod kay Police Major Rhea Sarah Villanueva, deputy chief of Police sang Silay City Police Station, ginafinalize na lamang nila ang affidavit sang witness kag mahimo mafile ang kaso sa masunod nga semana.
Ang ginalantaw nga motibo ang nahanungod sa trabaho sini bilang inkargado.
Sa pihak nga bahin nafile na sang Silay City Police sa City Prosecutor ang kaso sa duha man ka suspect nga nagpaarak sang luthang sa mag-utod nga trisikad driver sa Antonio Luna Interior, Brgy. Mambulac, Silay City, Negros Occidental sang Pebrero 19.
Madumduman nga napatay si Mark Bitanico, 33 anyos samtang pilason naman ang iya manghod nga si Paulo Britanico, 28 anyos.
Ang duha ang naga-inom inom sang makahulubog nga ilimnon sa sulod sang ila compound sang sila ang ginpalapitan sang suspect kag ginluthang.
Sa pihak nga bahin, nagfile na sang affidavit of non interest sa pagpasaka sang kaso ang ginikanan sang 23 anyos nga si John Loyd Layson nga ginluthang-patay sa Hacienda De Fuego 1, Brgy. Bagtic, Silay City sang Pebrero 3.
Si Layson ang napriso na bangod sa pagpangawat, kag kilala man nga notorious nga kawatan, kag samtang ini ang nagapungkuon malapit sa basketball court, siya ang hinali na lamang nga ginluthang.
Nakilala man sang kapulisan ang suspect, apang ang mga ginikanan ang wala sang plano nga magpasaka sang kaso gani ini ang makabig na nga case closed.
