Nagdangat na sa kapin 210 ang kaso sang Amoeba sa siyudad sang San Carlos santo sa data, kun sa diin isa ka tatlo ka tuig nga bata ang napatay bangod sa balatian.
Sa interview sang Bombo Radyo kay San Carlos City Mayor Renato Gustilo, sang Martes umpisa nga nagdamo ang pasyente sang kaso nga Amoeba, apang sang Miyerkules nadangat na sa 190 ang reported cases kag sang Huwebes ini ang yara na sa 210.
Aminado ang alkalde, nga ang numero ang nagasaka kag nagapanaog, bangod kun may yara sang pasyente nga nagasulod may-ara man sang nagakadischarge.
Kalabanan sa mga pasyente ang mga kabataan, kag suno kay Gustilo, mahimo nga nakuha sang mga ini ang Amoeba sa mga pagkaon nga ginabakal sa mga mobile cart sa gwa sang eskwelahan.
Sa karun, ginatrabaho na ang pagmonitor sa mga mobile carts kag water refilling stations sa siyudad sang San Carlos, kun sa diin ang mga ini ang ginakuhaan sang sample agud ma-determine kun may yara sang bacteria.
Samtang, may yara naman sang mga lugar sa siyudad kun sa diin sila ang nagakuha sang tubig sa mga suba kag bubon kag ini ang gina-inom nga wala makaagi napabukalan.
Sa karun, isa ang reported nga nagtaliwan bangod sa amoeba.
Suno kay Gustilo, kritikal na ang kondisyon sang tatlo ka tuig nga bata sang ini ang gindala sa ospital.
