Nagsaka na sa 43 ang numero sang COVID cases sa probinsya sang Negros Occidental matapos madugangan sang tatlo kahapon.
Si Patient No. 41 ang isa ka 41 anyos nga babayi kag residente sang Sagay City ,Negros Occidental.
Ang pasyente ang isa ka Locally Stranded Individual (LSI) nagikan sa Cebu, asymptomatic kag yara sa karon nakaquarantine sa Local Government Unit (LGU) facility.
Si Patient No. 42 ang isa ka 21 anyos nga lalaki, kag residente sang banwa sang Hinigaran, Negros Occidental.
Ang pasyente ang isa ka LSI nagikan sa Cebu, asymptomatic kag nagapaidalum sa istrikto nga home quarantine.
Samtang si Patient No. 43 ang isa ka 23 anyos nga lalaki kag residente sang Escalante City, Negros Occidental.
Ang pasyente ang isa man ka LSI nga nagikan sa Cebu, asymptomatic kag nakaquarantine sa LGU facility.
Ang kabug-usan nga kaso sa probinsya sang Negros Occidentral ang nagdangat na sa 43, samtang ang sa Bacolod City naman ang nagapabilin nga yara sa 28.
Kadungan nga nagpositibo sa record sang DOH sa Western Visayas kahapon ang 12 ka positibo nga kaso sa siyudad sang Iloilo.
Sa karon nagdangat na sa 197 ang kabug-usan nga kaso sang COVID-19 sa Western Visayas.
