Nagdangat na sa 17 ang mga kaso sang covid 19 sa ciudad sang Bacolod santo sa ginpagwa nga case bulletin #72 sang Department of Health, Western Visayas kahapon.
Suno sa data nga ginpagwa sang City Health Office si Bacolod City Covid patient No. 17 ang isa ka 37 anyos nga lalaki nga seafarer kag may travel history sa Miami, Florida antes pa ini magpadulong sa Metro Manila.
Ini ang naghalin sa Miami, Florida sadtong Abril 18 kag nag-abot sa Manila sa pareho nga adlaw kag nag-umpisa magpaidalom sa quarantine facility sa isa ka hotel.
Si Bacolod Patient No. 17 ang nagpaidalom sa RT-PCR test sadtong Mayo 5 kag nagnegatibo.
Ginsaylo ini sa isa pa ka hotel sa Manila kun sa diin may yara sang roommate sa sulod sang isa ka adlaw.
Nahibaluan nga nagpadulong sa ciudad sang Bacolod si Patient No. 17 sadtong Mayo 19 sakay sa Passenger vessel kag nag-abot sadtong Mayo 20 kun sa diin gilayon man nga gindala sa quarantine facility.
Ginpaidalom liwat RT-PCR test sa quarantine facility kag nag-abot ang resulta kahapon kun sa diin nagpositibo ini.
Sa karun, padayon ini nga nakaquarantine, nagapabilin nga asymptomatic kag wala sang iban pa nga pre-existing health condition.
