Aminado si Negros Occidental Governor Eugenio Jose “Bong” Lacson nga amat-amat naman nga nagasaka ang active cases sang COVID-19 sa probinsya.
Suno sa gobernador, sang nakaligad nga inadlaw, amat-amat na kuntani nga naganubo ang kaso kun sa diin yara nalang sa 640 ang aktibo apang liwat naman ini nga nagsaka kun sa diin kahapon nagdangat na sa 738 ang aktibo nga kaso.
Paathag sini nga apisar nga naganubo na sang tinalikdan nga inadlaw, wala naman ini nagakahulugan nga magapabilin sa pagnubo ang kaso, samtang ginalantaw man sini nga maykaangtanan ang pagkadikubre sang Delta variant sa pagsaka sang kaso.
Pasalig sini nga padayun nga ginapatuman ang extraction sa mga nagapositibo, apang pahanumdom man sini nga salabtun sang tanan ang pag-obserbar sang minimum health protocols.
Panugyan man ni Lacson nga sa tion nga nakaschedule na para sa vaccination, indi na magpamalibad sa pagpabakuna.
Pasalig sini nga sa tion nga mangin fully vaccinated na, enkaso matapikan sang COVID-19, magapabilin lang ini sa mild kun indi asymptomatic.
Paathag sini nga ang nabakunahan ang may-ara na sang masaligan nga proteksyon batok sa virus.
Nagalaom naman ang gobernador nga indi na magsurge ang COVID-19 infections sa probinsya.
Ginpakigbahin man ni Lacson nga magapabilin ang pagrequire sang negatibo nga RT-PCR test result sa mga magasulod sa probinsya.
Pahanumdom man sini nga likawan ang pagtililipon bangod ini masami ang nagatuga sang surges.
Paathag ni Lacson, nga indi pa pwede makapahalog sang pagsulundan ang Negros Occidental kag indi man makasunod sa iban nga pungsod nga nagapangabuhi kaupod sang COVID-19, nga kaangay nga ini ang isa nalang ka normal nga flu kun sa diin ang mga nagakatapikan ang magaayo lang gilayon.
Suno kay Lacson, mahimo na ini sang iban nga pungsod bangod mataas na ang porsyento sang ila vaccination.
