Aminado ang opisyal sang Talisay nga ang padayon nga kampanya sa pagtuman sang health protocols kag kooperasyon sang mga pumuluyo ang nangin yabi agud nga mapanubo ang kaso sang COVID-19 sa syudad sang Talisay, Negros Occidental.
Sa interview sang Bombo Radyo Bacolod kay Atty. Jonathan Ealdama, City Administrator sang Talisay City, sa 615 nga narekord nga kaso sang Covid-19 sa syudad nagdangat sa masobra sa 500 ang nakarecover samtang 12 naman ang active cases matapos nga madugangan kahapon sang duha bangud nagpositibo ang Overseas Filipino Worker (OFW) kag Locally Stranded Individuals (LSI) nagikan sa Manila.
Suno kay Ealdama, dako nga bagay ang kooperasyon sang mga residente gani liwat ini nga nag-apelar nga tumanon ang mga health protocols kaangay sang disinfection kag social distancing.
Ginpahayag man sini nga isa nalang nabilin nila nga quarantine facility bangud natalana nga mapull out ang isa ka pribado nga quarantine facility.
Ginabutang sang syudad ang mga asymptomatic nga positive patients sa RDL building nga quarantine facility sang syudad apang mga symptomatic ang ginadala sang provincial healing center kag ospital.
Suno pa kay Ealdama nagapasalamat ang syudad sang Talisay sa pagpanguna ni Mayor Neil Lizares sa Bombo Radyo kag iban man nga media entities nga nagabulig sa kampanya sang husto nga health protocols kasubong man ang pumuluyo nga padayon nga nagaugyon sa syudad bangud ang away sa balatian ang indi lang iya sang gobyerno kundi iya man sang mga residente.
