Nagpositibo liwat sa coronavirus disease 2019 ang isa ka 38-anyos nga lalaki nga repatriated overseas Filipino worker nga taga-ciudad sang Bacolod matapos nga mag-ayo na sadto sa balatian.
Sa interview sang Bombo Radyo Bacolod kay Vice Mayor El Cid Familiaran, chairman sang inter-agency task force against coronavirus, ginpahayag sini nga isa ka cruise ship nurse ang pasyente kag naka-facility quarantine sa karon.
Ginapahayag nga may yara ini sang travel history sa Miami, Florida kag Manila.
Suno kay Familiaran, Marso 15 sang nag-anchor ang cruise ship ni Patient No. 15 sa Miami kun sa diin may yara ini sang upod nga positibo sa virus.
Nagdevelop ini sang hilanat kag sintomas sang Abril 4.
Gin-admit ang pasyente sa isa ka ospital sa Miami kag nadiagnosed nga positibo sa COVID-19 sadtong Abril 9 tubtob Abril 23.
Nakagwa ini sa ospital matapos nga mag-ayo ang kondisyon kag magnegatibo sa coronavirus sa iya nga repeat test sang Abril 23.
Nagtinir ini sa isa ka hotel sa Miami tubtob sang Abril 30.
Mayo 1 sang nag-abot si Patient No. 15 sa Manila.
Gin-quarantine ini sa isa ka hotel sa Manila tubtob sang Mayo 18.
Negatibo ini sa rapid test kag negatibo man sa RT-PCR test nga ginpatigayon.
Mayo 18 sang nagbiya ini sa Manila via 2Go Malasakit voyage kag Mayo 20 sang nag-abot ini sa Bacolod kag gindiretso quarantine.
Mayo 26 ini ginpaidalom sa swab test kag kahapon naggwa ang resulta nga positibo ini liwat sa COVID-19.
Suno kay Familiaran, asymptomatic ang pasyente kag wala sang ano man nga pre-existing health conditions.
Samtang, ginkumpirmar naman sang bise alkalde nga may yara sang isa ka bangko sa ciudad nga nag-lockdown matapos ginpahayag ni Patient No. 14 nga isa ka 36-anyos nga babayi nga taga-Barangay Taculing nga nakakadto ini didto antes pa man naggwa ang resulta nga positibo siya sa balatian.
