Nadugangan sang lima ang kompirmado nga mga kaso sang coronavirus disease 2019 (COVID-19) sa ciudad sang Bacolod samtang duha naman ang nagdugang sang probinsya sang Negros Occidental.
Sa COVID-19 Case Bulletin 96 nga ginpagwa sang Department of Health kahapon, ang mga nagpositibo nga taga Bacolod ang ginalakipan ni Bacolod Patient No. 47, isa ka 27-anyos nga babaye, taga Brgy. Mandalagan kag isa ka LSI nagikan sa Manila; Bacolod Patient No. 48 nga isa 26 anyos nga lalaki nga LSI nagikan sa Manila kag taga Brgy. Mansilingan; Bacolod Patient No. 49 nga isa ka 29 anyos nga babaye, OFW nagikan sa Kingdom of Saudi Arabia kag residente sang Brgy Felisa; Bacolod Patient No. 50, 41 anyos nga babaye, OFW man nga nagikan sa Saudi Arabia kag residente sang Brgy. Taculing; kag Bacolod Patient No. 51, 35 anyos nga babaye, OFW nagikan sa Saudi Arabia kag residente sang Brgy. Handumanan.
Ang mga nagpositibo naman sa Negros Occidental ang ginalakipan sang isa ka 25 anyos nga babaye nga OFW kag 30 anyos nga lalaki nga LSI, lunsay mga residente sang Bago City.
Sa karun, may yara na sang 47 ka mga positibo nga kaso sang COVID-19 sa ciudad sang Bacolod samtang 85 naman sa Negros Occidental.
Samtang, nagpagwa si Governor Eugenio Jose “Bong” Lacson sang Executive Order No. 20-28 nga naga-extend sang modified general community quarantine (MGCQ) sa bilog nga probinsya epektibo kaina, Hulyo 01, alas 12:00 sang kaagahon tubtob Hulyo 15, 2020.
