Nakarecord sang 12 ka bag-o nga kaso sang COVID-19 ang probinsya sang Negros Occidental samtang isa naman ang nagdugang sa Bacolod kahapon.
Ang mga nagpositibo sa Negros Occidental ang ginalakipan sang 31 anyos nga lalaki nga residente sa banwa sang Cauayan kag isa ka locally stranded individual (LSI); 19 anyos nga babayi kag 48 anyos nga lalaki nga lunsay mga residente sa banwa sang Murcia kag mga LSI; 25 anyos nga babayi nga residente sa Silay City kag isa ka OFW; 62 anyos nga babayi residente sa Himamaylan City kag isa ka LSI; kag 26 anyos nga babayi nga residente sang banwa sang Calatrava kag isa ka LSI.
Nagpositibo man ang 21 anyos nga lalaki nga residente sang banwa sang Manapla, isa ka LSI; kag 30 anyos nga lalaki nga residente sang Sipalay City kag isa man ka LSI.
May nagdugang naman nga apat ka panibag-o nga kaso sa Talisay City nga ginalakipan sang 38 anyos, 52 anyos kag 36 anyos nga mga lalaki kag 30 anyos nga babayi nga mga bikers kag nahibaluan nga nakacontact sa COVID-19 patient sang siyudad nga isa ka dialysis nurse kag nagatrabaho sa pribado nga ospital sa siyudad sang Bacolod.
Samtang nagdugang naman sa COVID-19 cases sa siyudad sang Bacolod ang isa ka 30 anyos nga babayi.
Sa karun, may yara na sang 196 nga kabug-usan nga kaso sang COVID-19 sa Negros Occidental samtang 62 naman sa ciudad sang Bacolod.
