14 ka panibag-o nga kaso sang coronavirus disease ang narekord sa Negros Occidental kahapon samtang lima naman sa ciudad sang Bacolod kalakip na ang isa nga nagtaliwan.
Sa COVID-19 Case Bulletin 115 nga ginpagwa sang Department of Health kahapon, ang nasambit nga fatality ang ginkilala kay WV 754, isa ka 64-anyos nga lalaki nagikan sa Bacolod City.
Sa Western Visayas, nadugangan sang 26 ang mga kaso sang balatian gani nagdangat na ang kabug-usan sa 763.
33 ka panibag-o nga recoveries ang narekord gani nagdangat na ang kabug-usan nga nag-alayo sa 413 samtang nagsaka sa 14 ang death toll matapos madugangan sang duha ka mga fatalities.
Sa mga nakarecover, 10 diri ang nagikan sa Negos Occidental samtang wala naman sang may nagdugang sa ciudad.
Sa karun, yara na sa 269 ang kabug-usan nga mga kaso sang COVID-19 sa Negros Occidental kag 77 naman ang sa ciudad sang Bacolod.
