Lima ang nagdugang sa positibo na kaso sang COVID-19 sa probinsya sang Negros Occidental kahapon samtang duwa naman ang narecord sa ciudad sang Bacolod.
Suno sa Department of Health (DOH) Region 6 COVID-19 case bulletin no. 123, ang mga nagpositibo sa Negros Occidental ang ginalakipan sang 23 anyos nga lalaki nga residente sa banwa sang Valladolid, 21 anyos nga lalaki nga residente sa Himamaylan City, 23 anyos nga babayi nga residente sa banwa sang Pontevedra kag 47 anyos nga babayi nga residente sa Talisay City kag lunsay mga locally stranded individual (LSI) kag isa ka 39 anyos nga babayi nga residente man sa Talisay City nga yara sa idalum sang Facility Quarantine.
Samtang ang duwa naman nga nagdugang sa Bacolod amo ang 23 anyos nga lalaki kag 44 anyos nga babayi nga lunsay nakahome quarantine.
Nagdangat na sa 1,141 ang kabug-usan nga kaso sang COVID-19 sa Western Visayas sa pagdugang sang 49 nga panibag-o nga kaso.
Sa kabug-usan nga kaso sa Western Visayas, 496 diri ang active cases, 629 ang mga nakarecover kag 19 diri ang panibag-o samtang 16 naman ang nagtaliwan bangod sa virus.
Sa karun, may yara na sang 413 ka mga kompirmado nga kaso sang COVID-19 sa Negros Occidental samtang 151 naman sa ciudad sang Bacolod.
Samtang, nagpadangat naman sang mensahe si Dr. Zephard Gerhard Caelian nga may masobra 100 ka mga locally stranded individuals nga magaabot sa probinsya nagikan sa Metro Manila subong nga adlaw.
Suno kay Caelian, kahapon kuntani ang mga ini magapauli apang wala natigayon.
