Apat ka panibag-o nga kaso sang COVID-19 ang nagdugang sa probinsya sang Negros Occidental, santo sa ginpagwa nga datos sang Department of Health Region 6 kahapon.
Si Negros Occidental Patient No. 44 ang isa ka 44 anyos nga lalaki nga residente sa banwa sang Binalbagan, Negros Occidental.
Si Negros Occidental Patient No. 45 naman ang isa ka 24 anyos nga lalaki nga residente sang San Carlos City, Negros Occidental.
Si Negros Occidental Patient No. 46 ang isa ka 50 anyos nga lalaki nga residente sang Calatrava, Negros Occidental.
Samtang si Negros Occidental Patient No. 47 naman ang isa ka 34 anyos nga lalaki kag residente sang La Carlota City, Negros Occidental.
Ang mga panibag-o nga nagpositibo sa COVID-19 ang lunsay mga locally stranded individual (LSI) nga nagikan sa Cebu.
Ang mga pasyente ang lunsay asymptomatic kag yara sa tagsa ka mga LGU quarantine facility.
Sa karon nagdangat na sa 47 ang kabug-usan nga kaso sang COVID-19 ang narecord sa probinsya.
Samtang nadugangan man sang isa ang positibo nga kaso sang COVID-19 sa Bacolod City.
Si Bacolod City Patient No. 29 ang isa ka 26 anyos nga lalaki kag residente sa Barangay 1, Bacolod City.
Isa ini ka locally stranded individual (LSI) nga nagikan sa Tabuelan, Cebu.
Nag-abot ini sa siyudad sadtong Hunyo 15 sakay sa isa ka city bus nga nagikan sa Escalante City.
Direkta naman ini nga gindala sa quarantine facility pag-abot sa siyudad kag ginpaidalom sa swab test sadtong Hunyo 15.
Naggwa ang resulta sini kahapon nga positibo sa RT-PCR test.
Wala naman ini sang ginapakita nga sintomas sang balatian.
Samtang ang kabug-usan nga kaso naman sang COVID-19 sa Western Visayas ang nagdangat na sa 203.
