Ginkompirmar sang pinuno sang City Disaster Risk Reduction and Management Office (CDRRMO) sang Talisay City, Negros Occidental nga nagnubo na ang COVID-19 cases sa syudad.
Madumduman nga sang tinalikdan nga semana, nagapanguna ang syudad sa may pinakamadamo nga COVID-19 cases sa probinsya.
Sa interview sang Bombo Radyo Bacolod kay Geoffrey Guttierez, ginpahayag sini nga may kabug-usan nga 562 nga kaso sang COVID-19 ang syudad, 55 diri ang active cases, 491 ang recoveries kag 16 ang recorded nga nagtaliwan bangud sa balatian.
Suno kay Guttierez, ang ginhalinan sang pagdamo sang kaso sa syudad sang Talisay amo ang mass testing kag gilayon nga pagpatigayon sang swab test sa mga naclose contact sang mga nagpositibo sa COVID-19.
Ginpahayag man sini nga sang Miyerkules nagzero case na ang syudad apang kahapon nadugangan sang duha matapos nga magpositibo ang duha ka mga Locally Stranded Individuals (LSI) nga yara sa karun sa quarantine facility sang syudad.
Suno kay Guttierez, nagdiutay ang kaso sang nagpositibo sa balatian sa syudad bangud sa gindumilian ang home quarantine sa mga nagpositibo, ginpanubuan ang curfew hours kag ginpatuman ang “no movement Sunday”.
Nagpanugyan man ini sa mga pumuluyo sang Talisay City nga sa tion nga maggwa magsuksok sang face mask, face shield kag iobserbar ang tanan nga health protocols batok sa COVID-19.
