Nadugangan pa sang duha ka mga kaso sang Delta Variant ang ciudad sang Bacolod.
Sa interview sang Bombo Radyo kay Bacolod City Administrator Em Ang, Executive Director sang Emergency Operations Center, isa ka anum ka bulan nga bata nga lalaki sang Brgy. Bata kag isa naman ka 45 anyos nga lalaki sang Brgy. Villamonte ang nagdugang nga mga kaso sang Delta Variant.
Lunsay nakatapos naman sang isolation ang mga nagpositibo santo sa ginpagwa nga report sang Philippine Genome Center.
Nahibaluan nga may una na nga apat ka mga kaso sang Delta Variant ang ciudad kon sa diin lunsay nakatapos sang isolation kag negatibo sa repeat test.
Suno kay Ang, Hulyo 22 sang nagpositibo ang anum ka bulan nga lapsag samtang Hulyo 30 naman ginpaidalum sa swab test ang 45 anyos nga lalaki.
Suno sa iya, makabig nga clinically recovered na ang duha nga kaso kag karun nagatipon pa sila sang dugang nga detalye tuhoy diri.
Suno diri, indi na infectious ang mga ini apang igapatuman gihapon ang protocol santo sa direktiba sang Department of Health, kaangay sang pagpapatigayon sang repeat test kag pagpatuman sang surgical lockdown.
Kun magnegatibo ang ila resulta, wala na sang dapat kahangaw-an kag tumuron nalang ang mga close contacts nila agud masigurado nga wala naglapta ang virus.
Suno sa city administrator, ang mga nagakarekord nga kaso sang Delta variant sang COVID-19 ang nagapakita lamang nga nagapang-igo man ang virus sang mga kabataan.
Nagpanugyan man ini sa mga pumuluyo nga apisar nga fully vaccinated na, indi gid magpakampante kag magsunod gihapon sa health protocols.
