Nagdangat na sa 16 ang napatay bangod sa dengue sa probinsya sang Negros Occidental.
Sa interview sang Bombo Radyo Bacolod kay Negros Occidental Provincial Health Officer Dr Gerlie Pinonggan, padayun ang pagsaka sang kaso sang dengue apang indi na tuman ka dasig indi kaangay sang tinalikdan.
Sa latest data halin Enero 1 tubtob Nobyembre 2, nagsaka na sa 5,528 ang kaso kag 16 na ang ginbawian sang kabuhi.
Ang dengue cases ang mas mataas sang 352.33 percent kun ipaanggid sa kaangay nga period sang 2023 nga may-ara lamang sang 1,309 nga kaso.
Nagapanguna sa may pinakamadamo nga kaso ang Bago City nga nagdangat sa 644 dengue cases, 424 sa San Carlos City, 405 sa Hinobaan, 345 sa Sagay City, 338 sa Talisay City, 333 sa Kabankalan City, 330 sa Silay City, 329 sa Cauayan, 301 sa Cadiz City kag 277 sa Sipalay City.
Bangod sa may tumalagsahon gihapon nga mga pag-ulan, aminado si Pinonggan nga may nagapabilin pa nga mga breeding places ukon maitlogan sang lamok.
Sa paglibot sang mga health workers, nakita man nila nga nagasunod naman ang mga pumuluyo sa ginarekomendar nga sanitation ukon pagpaninlo partikular na sa mga lugar nga may napatay bangod sa dengue.
