Nagsaka sa 97 percent ang kaso sang dengue sa ciudad sang Bacolod sa isa lang ka semana humalin sang Pebrero 2 tubtob Pebrero 8 sa karun nga tuig.
Sa interview sang Bombo Radyo Bacolod kay Dr. Grace Tan, pinuno sang Environment Sanitation Division sang Bacolod City Health Office, may 124 na ka kaso sang dengue ang narekord nga mas mataas kun ikumpara sa magkaangay nga period sang tinalikdan nga tuig nga yara lang sa 63 ang dengue cases.
Suno diri, bisan nga 97 percent ang pagsaka, wala sang deklarasyon sang outbreak sa ciudad.
Ang lima ka barangay nga may pinakamataas nga kaso sang dengue amo ang Brgy Mansilingan nga may 12 ka kaso, Brgy Tangub nga may 11 kag Brgy Alijis, Singcang, kag Villamonte nga may tag-pulo ka kaso.
Tinalikdan nga tuig may pinakamataas nga kaso amo ang brgy Taculing apang sa karun wala ini nalakip sa top 5.
Kalabanan sa mga kabataan nga nahalitan sang nasambit nga balatian ang naga-edad sang 11 tubtob 19 anyos sa lalaki kag isa ka tuig tubtob 10 ka tuig sa babayi kag sa kabilogan 48 ang naapektohan sa lalaki kag 43 ang numero sang naapektohan nga babayi.
