Nagsaka sang 202.6 percent ang kaso sang dengue sa syudad sang Bacolod halin sang bulan sang Enero tubtub Hulyo subong nga tuig kun ipaanggid sa kaangay nga period sang tuig 2021.
Santo sa data sang Bacolod City Health Office, nagdangta na sa 345 ang kabug-usan nga dengue cases sa malapit pito ka bulan.
Nagikan sa kabug-usan nga numero, 338 diri ang natapikan sang balatian nga dengue samtang pito na ang nagkalamatay.
Ang mga nagkalamatay ang ginalakipan sang duha sa Barangay Mansilingan kag may tag-isa sa Singcang, Pahanocoy, Sum-ag, Tangub, kag Barangay Granada.
Sa interview sang Bombo Radyo Bacolod Dr, Grace Tan, head sang Environment and Sanitation Section sang CHO, may yara sang 14 ka Barangay nga apektado sang dengue kun sa diin kalabanan ang nagikan sa named barangays nga ginalakipan sang Barangay Mansilingan, Taculing, Handumanan, Alijis, Sum-ag, Tangub, Sincang, Villamonte, Cabug, Felisa, Granada, Estefania kag Barangay 14.
Nagapanguna sa may pinakamadamo nga kaso ang Barangay Tangub kag Mansilingan nga may yara sang 31 dengue cases, ginsundan sang Estefania nga may 27, Barangay Taculing kag Sincang may 26, Barangay Sum-ag may yara sang 25, Alijis may 21 ka mga kaso sang dengue, Villamonte may 20 ka mga kaso, Mandalagan may 19 ka dengue cases, samtang ang Handumanan kag Granada may yara sang 16 ka mga kaso sang dengue.
Suno kay Tan, sa bulan sang Hunyo tubtob Agosto mahimo nga magsaka ang kaso sang dengue bangud tig-ululan.
Ang dengue ang wala sang ginapili nga edad kun sa diin mahimo matapikan ang nagaedad sang isa ka bulan tubtob 86 anyos.
Agud nga mahatagan sang solusyon ang nagaduging nga kaso sang dengue, ang City Health Office ang nagapanugyan nga ipabilin ang pagtinlo sang palibot samtang nagapatigayon man ini sang fogging batok sa mga lamok nga nagadala sang dengue.
