Nagnubo ang kaso sang dengue apang nagsaka naman ang kaso sang leptospirosis sa Bacolod City subong nga 2025 kun ipaanggid sa kaangay nga period sang 2024.
Sa interview sang Bombo Radyo Bacolod kay Dr Grace Tan, head sang Environment and Sanitation Division sang Bacolod City Health Office, 26.7 percent ang ginpanaog sa kaso sang dengue santo sa Morbidity Week 34 halin Agosto 17 tubtob 23, kun sa diin nagadangat na sa 745 ang kaso kag may lima nga napatay, mas manubo kun ipaanggid sa 1,029 cases sa kaangay nga period sang 2024, nga may-ara sang pito nga napatay.
Nagapanguna sa may pinakamadamo nga kaso ang Barangay Mansilingan nga may 79 ka kaso, 62 sa Taculing, 48 sa Tangub kag Estefana kag 45 sa Vista Alegre.
Samtang 26.7 percent naman ang ginsaka sa kaso sang leptospirosis kun sa diin may-ara na sang 19 ka kaso kag anom ka napatay, kun ikumparar sa 15 ka kaso kag anom nga napatay nakaligad nga tuig.
Palarehas nga nakarecord sang tig-duha ka kaso ang Barangay Banago, Handumanan, Felisa, Mansilingan kag Villamonte.
Sa karun, ginaseguro nila nga may-ara sang nagakaigo nga supply sang bulong para sa nasambitan nga mga balatian sa mga health centers.
Padayun man ang ila information campaigns paagi sa mainstream media, sa ila social media sites kasubong man nagatap sa mga eskwelahan para ma-edukar ang mga kabataan sa nagakaigo nga mga tikang agud malikawan ang dengue kag leptospirosis.
