Masobra 200 porsyento ang ginsaka sang kaso sang dengue sa Negros Occidental humalin Enero tubtob tunga-tunga sang Setyembre subong nga tuig kun ipaanggid sang 2023.
Sa latest data sang Provincial Health Office as of Enero 1 tubtob Setyembre 14, nagdangat na sa 3,851 ang kaso sang dengue.
Ini ang mas mataas sang 244.7 percent kun ipaanggid sa kaangay nga petsa nakaligad nga tuig, ukon may pagsaka sang 2,734 ka kaso.
Samtang ang napatay sa dengue ang nagsaka naman sa 10 ka persona.
Sa interview sang Bombo Radyo Bacolod kay Negros Occidental Provincial Health Officer Dra. Ma. Girlie Pinongan, nagnubo na kuntani tinalikdan nga duha ka semana ang pagsulod sang dugang nga mga kaso, apang hinali naman nga nagsaka nakaligad nga semana kag nadugangan pa ang napatay.
Nakaligad nga sinimana, nagpanguna ang banwa sang Hinobaan sa pinakadamo nga kaso, apang ini sa karun ang nalapawan na sang Bago City nga nakarecord sang 369 ka kaso.
Ang Hinobaan ang nakarecord sang 325, samtang 262 sa San Carlos City, lunsay 250 sa Sipalay kag Talisay City, 249 sa Kabankalan City, 248 sa Sagay City, 2018 sa Cadiz City, 210 sa Silay City kag 201 sa Cauayan.
Ang mga kaso ang kadam-an yara sa edad isa tubtob napulo ka tuig.
Balantayan naman suno kay Pinongan ang masunod nga semana ilabi na nga tayuyon ang ulan kag madamo sang sarang mapangitlogan ang mga lamok.
Dugang pa sini nga madamo sang mga nagatinir sa karun sa evacuation centers.
Pasalig man sini nga ginalibot nila ang mga evacuation centers kag nagahatag sang bulong sa mga nagahilanat kag iban pa nga balatian.
Panawagan man sini nga sa ikaduha nga adlaw sang paghilanat mas maayo nga ipakonsulta na gilayon sa mga health centers kag ospital agud makaseguro bangod kalabanan sa mga napatay ang malala na antes paman madapatan sang pagbulong.
Pasalig sini nga nagapabilin man ang dengue lanes sa mga ospital.
