Amat-amat na nga nagnubo ang kaso sang dengue sa probinsya sang Negros Occidental samtang nagsaka naman ang kaso sang Hand, Foot and Mouth Disease.
Santo sa datos sang Provincial Health Office humalin sang Enero 1 tubtob Agosto 30 subong nga tuig, 4,296 ang reported nga kaso sang dengue kun sa diin nagsaka sa 364 ang kaso kun ikumpara sa kaangay nga period sang tinalikdan nga tuig.
Sa 31 ka Local Government Unit, nagapanguna nga may pinakamadamo nga kaso sang dengue amo ang Bago City nga may 1,017 ka reported case; La Carlota City nga may 397 ka kaso; Kabankalan City nga may 381 ka kaso; San Carlos City nga may 222 ka kaso; Isabela nga may 196 ka kaso; Silay City nga may 184 ka kaso; Cauyan nga may 154 ka kaso; Hinigaran nga may 141 ka kaso; La Castellana nga may 122 ka kaso kag Pulupandan nga may 115 ka kaso.
Siyam diri ang may nareport nga may napatay bangod sa dengue, isa sa Bago City, San Carlos City, Silay City, kag Hinigaran samtang duha naman ang napatay sa Isabela.
Sa kaso naman sang Hand, Foot and Mouth Disease, may yara sang 2, 155 ka kaso nga nareport sa bilog nga probinsya.
Nagapanguna sa gihapon ang Bago City nga may pinakamadamo nga kaso nga nagdangat sa 474; Cadiz City nga may 246 ka kaso; La Carlota City nga may 149 ka kaso; EB Magalona nga may 122 ka kaso; Escalante City nga may 118 ka kaso; Victorias City nga may 107 ka kaso; Pulupandan nga may 98 ka kaso; Sipalay City nga may 92 ka kaso; Manapla nga may 81 ka kaso kag Sagay City nga may 76 ka kaso.
Wala naman sang may nareport nga napatay sa kaso sang HFMD.
Suno kay Dr Gerlie Pinongan, head sang hospital operation department sang probinsya, mas maayo nga kun may makit-an na nga sintomas magpatsekyar na sa doctor.
Suno diri, padayon ang ila kampanya batok sa dengue kag Hand, Foot and Mouth Disease.
