Masobra 500 porsyento ang ginsaka sang kaso sang dengue sa Negros Occidental sini nga tuig kun ikumparar sang 2021.
Suno kay Dr. Jessica Fama, assistant head sang Provincial Health Office, humalin sang Enero 1 tubtob Hunyo 18, 2022, may yara sang 1,309 ka kaso sang dengue sa probinsya.
557 porsyento ang ginsaka sini kun ikumparar sang tinalikdan nga tuig sa kaangay nga period nga may yara lamang sang 199 dengue cases.
Pito naman ang nadulaan sang kabuhi bangud sa dengue sa Negros Occidental nga ginalakipan sang duha sa Calatrava kag tag-isa sa Himamaylan, Hinigaran, La Carlota, Talisay kag Toboso.
Sang 2021, tatlo lamang ang fatalities sa dengue humalin Enero tubtob Hunyo.
Nagapanguna ang ciudad sang Himamaylan sa may pinakamataas nga kaso sang dengue bangud sa 142 cases; ginasundan ini sang Kabankalan nga may 118; San Carlos nga may 111; Hinigaran nga may 107; La Carlota nga may 92; Binalbagan nga may 71; Cadiz nga may 58; Bago City nga may 55; kag Calatrava kag Pontevedra nga may tag 54 ka mga kaso.
Sa Western Visayas, ang Negros Occidental ang nagapanguna sa may pinakamadamo nga kaso sang dengue.
As of June 18, 2022, ang Region 6 ang may kabug-usan nga 3,653 reported cases sang nasambit nga balatian.
