Nakita ang dako nga pagsaka sa kaso sang dengue sa Western Visayas, partikular na sa Negros Occidental subong nga tuig.
Santo sa data sang Department of Health (DOH) Western Visayas – Regional Epidemiology and Surveillance Unit, dako ang nangin pagsaka sang kaso sang dengue sa Negros Occidental sa sulod sang 15 ka semana subong nga 2022 kun ipaanggid sa kaangay nga period sang 2021.
Santo sa data, sa Morbidity Week No. 12 sa petsa nga Marso 20 tubtob 26, nakita nga 14 ang mga nadugang nga kaso sang dengue kun sa diin nagdangat na ang kaso sa 166 humalin sang Enero 1.
Sa Morbidity Week No. 13, sa petsa nga Marso 27 tubtob Abril 2, nadugangan liwat sang 14 ka dengue cases ang Negros Occidental.
26 naman ang nadugang sang Abril 3 tubtob 9 sa Morbidity Week No. 14 kag nadugangan pa sang 17 sa Morbidity Week No. 15 sang Abril 10 tubtob 16.
As of April 16, ang kabug-usan nga dengue cases sa Negros Occidental ang nagdangat na sa 238 ukon 56 porsyento nga mas mataas kun ipaanggid sa dengue cases sang 2021 sa kaangay nga period.
Wala naman nadugangan ang numero sang napatay bangod sa dengue nga yara lang gihapon sa duha.
Sa bilog nga Western Visayas ang narecord nga kaso sang dengue humalin sang Enero 1 tubtob Abril 16, 2022 ang nagdangat na sa 714 samtang ang record naman sa kaangay nga petsa sang 2021 ang yara lang sa 689.
Suno kay Provincial Health Officer Dr. Ernell Tumimbang, nagakahangawa ini bangod santo sa trend kada tatlo ka tuig nagasaka ang kaso sang dengue.
