BACOLOD CITY — Yara na sa piskaliya ang kaso sang revenue officer sang Bureau of Internal Revenue sa ciudad sang Bacolod nga naarestar sa entrapment operation sang National Bureau of Investigation bangud sa pagpangilkil.
Sa madumduman nga naarestar si Revenue Officer I Julie Hernaez matapos gindugangan ang sukot sa corporate tax sang JP Ramos Trading Corporation.
Naghingyo sang bulig sang NBI ang operations manager sang kompaniya nga si Genevieve Buenaflor rason nga natikma si Hernaez samtang akto nga ginabaton ang kwarta.
Angot sini, ginpahayag nanday Bureau of Internal Revenue (BIR) Commissioner Caesar Dulay kag BIR Revenue Region 12 Director Atty. Eduardo Pagulayan Jr. nga ila ginpaimbestigar ang kaso ni Hernaez samtang ang pormal nga panumbungon ang yara na sa piskaliya.
Ginpasiguro man sang BIR officials nga nakahanda sila nga magbaton sang anuman nga reklamo sang kurapsyon batok sa ila mga empleyado kag ila ini gilayon nga imbestigahan.
