May yara sang pagsaka sa kaso sang dengue, leptospirosis, hand, foot and mouth disease sa mga kabataan, kag cholera sa ciudad sang Bacolod, santo sa report sang Bacolod City Health Office as of February 18.
Sa kaso sang dengue, may yara sang 71 ka kaso kun sa diin isa ang nagtaliwan gikan sa Barangay Villamonte apang nagapanguna sa lista nga may madamo nga kaso sang dengue ang Barangay Mansilingan nga may pito ka kaso, Estefania nga may anom ka kaso, Cabug nga may lima kag Pahanocoy nga may apat ka kaso.
Sa kaso sang leptospirosis, may yara sang 15 ka suspected cases kun sa diin duha ang patay nga nagsuprer sini, isa ka senior citizen kag 28 anyos nga lalaki nga nagatrabaho bilang construction worker nga lunsay naglusong sa baha sa Barangay Taculing kag Banago.
Sa kaso naman sang cholera, 10 ang suspected cases kun sa diin duha ang kumpirmado sa Barangay Estefania kag Alijis.
Samtang, nagdangat naman sa 101 ang kaso sang hand foot and mouth disease, nga may yara sang 88 ka mga affected individuals sa edad nga isa tubtub napulo ka tuig, kag ginapangunahan sang Barangay Handumanan nga may 20 ka kaso, Villamonte nga may 18 kag 10 sa Vista Alegre, nga may pinakadako nga numero nga apektado sang HFMD. Samtang, aminado ang doctor nga assigned sa Barangay Health Center sang Barangay Handumanan nga nagdamo ang kaso sang hand foot and mouth disease sa barangay bangud mas nangin aware na ang mga ginikanan nga dapat ipakonsulta ang ila kabataan kun may nakit-an nga sintomas diri.
Sa interview sang Bombo Radyo kay Dr. Dominique Francis Gumahin, in-charge sang Barangay Health Center sa Barangay Handumanan kag Barangay Alijis, madamo ang kaso sang bulan sang Enero apang nag-amat-amat na ini diutay subong nga bulan nga nagadangat nalang sa isa tubtub duha ka kaso kada semana.
Suno diri, nagdamo ang kaso bangud nagapakonsulta na ang apektado nga patimaan nga aware na ang mga ini.
Laban nga kaso ang nagikan sa eskwelahan ukon day care gani ginaabisuhan ang mga ginikanan nga kun may nadiparahan nga sintomas sa isa ka bata sa eskwelahan, abisuhan ang parents nga mapakonsulta man sang ila bata kun may nakit-an nga sintomas kaangay sang rashes.
Sadto, nagamato-mato lang ang mga ginikanan nga magbulong sa ila mga bata kun may nakit-an nga sintomas gani sila ang ginpanugyanan nga magpakonsulta gid sa health center.
Suno kay Gumahin, stable ang kondisyon sang laban nga pasyente kag rashes ang sintomas nga ila ginapakita.
Nagpanugyan naman ini sa mga ginikanan nga siguruhon nga malimpyo ang palibot kag masami gid nga paliguan ang mga kabataan agud nga mamaintain ang kalimpyo.
