For filing na ang kaso nga batok sa duha ka suspetsado nga nakuhaan sang balor P3.4 Million nga suspected shabu kapin ala-1:01 sang kaagahon kahapon sa Prk. Rose, Barangay 9, Bacolod City.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, section 5 kag 11 sang Republic Act 9165 ukon Comprehensive Dangerous Drugs Act of 2002 ang kaso nga ipasaka batok sa duha ka suspetsado.
Ang mga suspetsado ang ginkilala nga sanday Elizabeth Domaniel, 60 anyos, negosyante, kag residente sang Prk. Acacia 1, Brgy. 27, Bacolod City, kag Jupet Celiz, 18 anyos, trisikad driver kag residente sang Prk 8, Brgy. Tangub, Bacolod City.
Nakumpiskar gikan sa duha ang walo ka knot tied plastic sachet sang suspected shabu nga ginabanta nagabug-at sang kapin 500 grams kag nagabalor sang P3,400,000.
