Nagnubo ang kaso sang Violence Against Women and their Children (VAWC) sa probinsiya sang Negros Occidental sini nga 2019.
Santo sa datos sang Women and Children Protection Desk (WCPD) sang Negros Occidental Police Provincial Office (NOPPO), humalin sang Enero tubtob Noviembre sini nga tuig may yara sang 215 ka VAWC cases sa probinsiya.
Mas manubo ini sa 282 sang 2018 kag mas malayo sa masobra 1,000 sang 2017.
Ginatumod nga rason ni Police Master Sergeant Nida Grajo, WCPD head sang NOPPO sa pagnubo sang nasambit nga mga kaso sini nga tuig, amo ang nagapadayon nila nga kampanya ilabi na sa mga malayo nga lugar sa pagpahibalo sa mga kababainhan kag ila mga kabataan sang ila mga kinamatarong.
Sa ciudad sang Kabankalan, may yara lang sang isa ka VAWC case sini nga 2019 kag malayo sa 24 sang 2018.
Suno kay Police Master Sergeant Mary June Fuentes, WCPD head sang Kabankalan City Police Station, ini ang bangud sang aktibo nga mga VAWC desk nila sa tagsa ka mga barangay.
Suno diri, sa barangay pa lang gina-istoryahan na ang mga problema kag nagakasulbar na kag wala na nagalab-ot sa mga police stations.
Sa nahibaluan nga ginapatigayon karun ang 18-day campaign to end violence against women and their children.
Nagsugod ang programa sang Noviembre 25 kag magatapos sini nga Disyembre 12.
Indi lamang mga kababainhan ang ginatutukan sang Women and Children Protection Desk (WCPD) sang ciudad sang Bago sa ila kampanya agud mauntat ang pagpang-abuso sa mga kababainhan kag ila mga kabataan.
Suno kay Police Staff Sergeant, Jenevee Biasa, WCPD head sang Bago City Police Station, may yara karun sang 8 ka kaso sang Violence Against Women and their Children nga ila ginatutukan kag mas manubo sa 10 sang 2018.
Padayon nga nagapatigayon sang advocacy kag awareness campaign ang WCPD sa mga kababainhan agud mapahibalo sa ila ang ila mga kinamatarong agud maproteksyunan ang mga ini.
Apang talalupangdan ang ginpahayag ni Staff Sergeant Biasa nga sa tagsa nila ka mga pamulong-pulong sa barangay, masami gid nila ginahimo nga audience ang mga kalalakihan.
Ini bangud suno sa iya, sa masami ang mga kalalakihan man ang gina-akusaran sang pagpang-abuso sa mga babaye, sa ila mga asawa kag mga kabataan.
Nagapasalamat si Biasa nga aktibo ang local government unit sang Bago sa pagsuporta sa ila mga kampanya agud matapna ang pagpang-abuso sa mga kababainhan kag kabataan.
Kadamuan sang VAWC case nga gina-report sa Bago City Police Station amo ang physical injuries kag masami nga nagakatabo ini sa city proper kag indi sa mga nabukid nga kabarangayan.
