Ginpalab-utan sang bulig sang pinaagi sa Bombo Radyo Bacolod ang isa ka Stage 4 Breast Cancer Patient sa banwa sang Valladolid.
Madumduman nga ang pasyente nga si Gina Soberano ang nagpangayo sang bulig sa estasyon sadtong 2018.
Nagpangayo ini liwat sang bulig bangud sa nagalala nga balatian, kag nagkontak man sa Philippine Coast Guard Auxillary para mangayo sang pwede mapalab-utan sang bulig.
![](https://img.bomboradyo.com/bacolod/2020/05/95191614_2509528025819276_9193106016500187136_n-scaled.jpg)
Naabtan ang pasyente nga yara sa puluy-an kag naga-idagon samtang may naga-angot nga oxygen.
Tatlo lamang sila sa puluy-an kaupod ang duha ka bata sini— isa ka grade 7 kag grade 5 naman ang kamanghuran, samtang isa naman sa mga anak sini ang gin-adopt sang paryente.
Suno kay Commodor Dannyl Yap, sang Philippine Coast Guard Auxillary, nahibaluan naman sini ang sitwasyon sang pasyente bangod sa estasyon.
Napukaw naman ang balatyagun sang kada-isa sa squadron bangud sa nakita sang mga ini nga mas nagakinahanglan.
Kaupod man nga nag ugyon ang Philippine Coast Guard- Pulupandan sub-station.
Suno diri, tuman ka importante nga samtang buhi pa ang tawo, mabatyagan sini nga may ara pa nga nagapalangga.
Apisar nga may pila ka bulig gikan sa barangay, suno diri lain pa gid nga may bulig gikan sa iban.
Naghatag ini sang isa ka sako nga bugas kag mga groceries kaupod sang gin amut-amutan sang mga ini.
Ginpangako man ni Yap nga igahatag sang mga ini ang wheelchair nga isa sa ginapangita man sang mga ini nga bulig.
Samtang, tuman man nga pagpasalamat ni Gina Soberano sa nag-abot nga bulig.
Wala gid ini naga-laum suno sa iya.
Suno pa diri, ang 6 mil nga SAP ang ginalauman sini, gani daku-daku gid nga bulig ang nag abot diri.
Bisan sin-o naman ang ginpakitlu-oyan sini, kaupod na ang gin-amot amutan sang mga nurses nga oxygen sini.
Naluoy naman ini sa mga anak, bangod daw kaluluoy na ang mga ini.
Naintindihan nya naman ang mga ini nga kuntani ang nanay ang maatipan sa mga anak, diri naman ang suli.
Nagapasalamat man ang anak ni Gina nga si Isaac Soberano, Grade 7, sa mga naghatag sang bulig sa mga ini.
Ginapangabay man sini nga kuntani maabutan ini sang iloy nga makagraduate sang pagka-doktor.
Gusto sini nga mag doktor bangud handum man sini nga makabulig sa kaparehas sang iloy nga may balatian.
Nagpahayag naman ini nga nahuya na ini nga masami mangayo-kayo, apang padayun gihapon ini nga naghingyo sang wheelchair.
Ginapangako man sini nga tapuson ang pag eskwela agud nga malab-ot man ang handum sini nga maging doktor.