Aminado ang Director sang Office of the Civil Defense – Negros Island Region nga halos katunga sang mga tent sa Tent City sa ciudad sang Himamaylan ang nakaangkon sang damage.
Sa interview sang Bombo Radyo Bacolod kay OCD-NIR Director Donato Sermeno III, apisar nga wala nagamit ang Tent City, mas ginpakamaayo nila nga magrisgo.
Suno diri, mas maayo na lamang nga may ginhimo nga tikang sangsa wala sang alternatibo inkaso maglala ang sitwasyon.
Pahayag ni Sermeno nga ginabantayan sa karun sang katapo sang militar kag mga kapulisan ang Tent City, kag sila ang nagapadala man sang foodpacks para sa mga personnel.
Ang Himamaylan City Government ang nagabulig man sa pagmintenar sang Tent City.
Suno kay Sermeno, 300 ka tent units ang ila nga gintukod, kag halos tunga diri ang nagdeteriorate kag nagkalagisi bangod wala maka-agwanta sa mabaskog nga hangin kag ulan.
Bangod sini, ginpunpon na lamang nila ang mga tents, agud nga indi na madugangan ang guba, samtang ang mga ini ang sarang man nga matukod kun kinahanglan.
Suno kay Sermeno, bangod indi makaagwanta ang trapal sa hangin kag ulan, ginatun-an nila ang pagpangita sang iban nga indigenous materials nga mas magalawig.
Isa man sa suhestyon amo ang pagbakal sang military grade nga tents.
