Isa ka ehemplo sang katutom kag integridad ang ginpakita ni Raymus Tingson, traffic enforcer, matapos nga wala pangduha-duha nga gin-uli ang wallet nga nawigit sa sa bahin sang Lopues East, Bacolod City, Pebrero 5, pasado las 10:00 sang aga.
Samtang naga-monitor sang lakat sang trapiko, may natalupangdan si Tingson nga wallet sa kalsada.
Gilayon nga gindala ni Tingson sa Bacolod Traffic and Transport Management Department (BTTMD) ang nakit-an nga wallet, kag dason nga gin-endorso sa Public Information Office (PIO) agud didto paga-gawaron sang tag-iya ang iya wallet.
Suno kay Tingson, nakahibalo gid ini nga kinahanglanon gid sang tag-iya ang wallet bangud madamo sang IDs ang yara sa sulod nga nakabulig man sa madali nga pagkilala sa tag-iya nga isa ka barista kag ginkilala nga si alyas Stephen.
Suno diri, nakuha na ni Stephen ang gamit pasado ala-1:00 sang hapon.
Pahayag ni Tingson, dako gid ang iya kalipay nga nakita kag nauli ang wallet.
Dugang pa niya, kanami gid sa balatyagon nga napamatud-an nga indi lang para sa pagdumala sang trapiko ang traffice enforcers, kundi para man sa pagbulig sa isigkatawo.
Ang insidente mas nangin makahulugan pa gid bangud kaadlawan niya sadto nga adlaw, kag sa masunod nga bulan, isa na ka tuig si Tingson bilang traffic enforcer.
Nahibaluan nga si Tingson isa ka amay sang tatlo ka kabataan nga puro lalaki.
Ang iya kamagulangan nga anak ang isa ka manunudlo, ang ikaduha ang graduate na sang Business Administration nga kurso, kag ang ikatatlo ang yara pa sa college.
Antes siya nangin traffic enforcer, driver ini sang jeep nga may rota Shopping-Libertad sa sulod sang kapin 25 ka tuig.
Mensahe niya sa iya mga kaupdanan kag sa mga drivers, mag-focus lang gid sa obligasyon, magtinir nga matutom, kag magbuligayay permi sa dalanon.
