Ginkastigo ang isa ka lalaki matapos nga maaktuhan nga nagapangawat sa ciudad sang Bacolod, kahapon, Setyembre 16.
Sa interview sang Bombo Radyo Bacolod kay Police Captain Greeky Cayao, hepe sang Bacolod Police Station 8, naabtan sang isa ka security guard ang duha ka lalaki samtang nagapangawat sang stair nosing sa isa ka establisyemento sa Magsaysay St. sa Brgy. Singcang Airport kahapon sang aga.
Ginlagas sang security guard ang mga kawatan apang isa sa ila ang nakapalagyo.
Ang isa naman ang nalab-ot kag ginkastigo sang mga bystanders sa lugar.
Gindala naman ini sa ospital matapos nga makaangkon sang samad tuga sang pagkastigo.
Nakahunong na sa Bacolod Police Station 8 ang nakastiguhan nga kawatan.
Ginahulat naman sa karun sang kapulisan kung magapasaka sang kaso ang tag-iya sang establishment batok sa mga suspek.
