Padayon pa ang imbestigasyon sang Bacolod City Police Station 4 sa nadakpan nga nangawat sa Celine Homes Subdivision, Brgy. Estefania, Bacolod City kahapon sang kaagahon agud matumod ang iban pa nga miyembro nila.
Sa interview sang Bombo Radyo Bacolod kay Police Major Charles Gever, hepe sang Police Station 4, ang suspek nga nadakpan amo si Domar Noiz, 20 anyos, soltero samtang nakapalagyo naman ang duha niya ka mga kaupdanan nga ang isa nakilala kay Andrew Salvo, legal ang edad kag isa pa ka suspek, tanan pumuluyo sang Brgy. Estefania.
Suno diri, nakabaton sila sang impormasyon nga may nagapangayo sang police assistance bangud sa nagluntad nga robbery incident gani gilayon sila nga nagresponde sa pagpatigayon sang follow up operation kag natigayon nga madakpan si Noiz.
Natigayon nga makawat sang mga suspetsado ang ang mga dry goods nga nagabalor P9,000 pesos, sigarilyo balor P2,000 kag cash nga benta nga naglab-ot sa 9,000 pesos.
Kapin 20 mil ang kabug-usan nga ginkawat sang mga suspetsado sa biktima nga si Arnold Toledo, 44 anyos sang amo man nga lugar.
Ginpahayag man ni Gever nga ini ang mastermind sa mga kinawatay sa syudad sang Bacolod.
Nagapatigayon pa sila sang background investigation agud nga matumod ang iban nga pagpangawat sang suspetsado.
Samtang, ginpahayag naman sang suspetsado nga si Domar Noiz nga bangud sa pandemya kag sa kapigaduhon, nahimo nila nga magpangawat.
Suno diri, sa atubang sila sang sari-sari store nag-agi kag aminado man ini nga may nagabantay sa tiyangge.
Ginpahayag man sini nga wala sila nagdugay sa sulod kag ginbayaan man siya sang duha niya ka mga upod.
Suno kay Noiz, may nakakita sa iya nga nagpangawat.
Aminado man ini nga gingusto man nila kag ginplano ang pagpangawat.
Ginpanginwala man sini nga suod sila nga kilalahay sang iban nga suspetsado nga nagbiya man sa iya sang may nakabatyag sa sari sari store nga ila ginkawatan.
