Klaro nga nakuha sa CCTV camera ang nawong sang isa ka lalaki nga nagsulod sa isa ka balay para mangawat sa Barangay Sum-ag, Bacolod City, alas 2:00 kaina sang kaagahon.
Sa interview sang Bombo Radyo kay Jaysel ang tag-iya sang balay, nakabugtaw ini kag iya nakita ang lalaki nga yara na sa sulod sang ila kwarto nga kawaton kuntani ang iya laptop.
Suno diri, nagtulukay pa sila sang lalaki sang tatlo ka segundos antes ini nagdalagan pa gwa.
Nalagyo ang lalaki paagi sa bintana sa kusina nga amo man ang iya gin-agyan pagsulod sa balay.
Wala gid naglaum ang lalaki nga may yara sang CCTV sa sulod sang kwarto kag klaro nga na-capture ang iya nawong.
Samtang, nagapanawagan ang station commander sang Bacolod Police Station 9 sa kun sin-o man ang nakakilala sa lalaki nag suspetsado nga kawatan nga makig-angot sa ila estasyon.
Sa interview sang Bombo Radyo kay Police Captain Michael Tuburan, ginguba sang suspetsado ang kawayan sa likod nga bahin sang balay kag nag-agi sa bintana pasulod sa kusina.
Suno diri, ila gin-usisa ang lugar sa likod balay kag suno sa mga residente wala nila nakilal-an ang lalaki.
Dako naman ang pagpati ni Tuburan nga residente man lang sa ciudad sang Bacolod ang suspek kag indi lamang ini naga-isahanon nga may kaupod ini nga look out sa paghimo sang pagpangawat.
Samtang, wala naman nagpablotter ang biktima apang posible nga madagdag sa trespassing ang ginhimo sang suspek.
