Antes pa man naaresto, nakastiguhan ang 27 anyos nga lalaki matapos nga nadakpan sa akto nga nagapanulod kag nagapangawat sa balay sa Purok Mainuswagon, Barangay Alijis, Bacolod City.
Ang suspetsado ang ginkilala nga si Jeric Yulo, 27 anyos, single kag residente sa Purok Kaingin, Barangay Singcang-Airport kag gina-alegar notorious nga kawatan.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 7, si Yulo ang una na nga nagpangawat sa isa ka balay alas-4:00 sang aga.
Ini ang nabugtawan pa sang tag-iya bangod nagtaklas ini sa atop apang ini ang ginpabay-an nalang sang natungan.
Nataban sini gikan sa una nga balay ang ginabanta P90,000 nga cash kag gold nga relo nga balor P12,000.
Alas-10:00 sang aga, liwat naman nga may ginsulod nga balay ang suspetsado.
Apang siya ang nakita sang kaingod balay, gani antes paman ini nakagwa nagdugok na ang mga tawo sa gwa sang puluy-an nga nagabantay sa iya.
Pag-abot naman sang tag-iya, gilayon sini nga ginbuksan ang gate kag didto na ginpululihan kastigo ang suspetsado sang mga pumuluyo antes pa man ini nakuha sang mga kapulisan.
Nagsugata naman sa mga ini ang mga kagamitan nga ginpagwa na sang suspetsado sa bintana sang balay nga ginalakipan sang portable sewing machine, amplifier, computer box, portable lamp, power bank, sapatos, voltage regulator kag iban pa.
Bangod duha ka balay ang ginsulod ni Yulo, ginalantaw ni Ofalia nga duha man ka kaso sang robbery ang ipasaka batok sa iya.
Natukiban naman nga si Yulo ang anay nahunong na sa Muntinlupa bangod sa pagpatay kag illegal possession of firearms.
Si Yulo ang kilala man sa lugar bilang notorious nga kawatan sa Bacolod City.
