Arestado ang isa ka kawatan matapos ginransak ang isa ka balay sa Broce St. Barangay 4, ciudad sang San Carlos, Negros Occidental sang Pebrero 1 sang aga.
Sa interview sang Bombo Radyo Bacolod kay Police Major Ryan Villasario, Deputy Chief of Police sang San Carlos City Police Station, nagpadulong sa police station ang isa ka concerned citizen agud nga ireport ang nagluntad nga insidente sang pagpangawat.
Ginkilala ang suspek nga si Alex Rafols, residente sang Phase 4, Fatima Village, Barangay Rizal, ciudad sang San Carlos kasunod sang ginpatigayon nga hot pursuit operation sang mga kapulisan sa ciudad samtang ginapangita pa si Kenz Jay Ronquillo kag residente sang Phase 4, Fatima Village, Brgy. Rizal, San Carlos City nga kaupod man sini sa pagpangawat.
Madasig nga nakilala si Rafols bangud sa nabilin sini nga kalo sa balay sang biktima.
Samtang ang biktima naman ang ginkilala kay Jade Jayawon, 27 anyos, single kag isa ka coach kag residente sang Broce St. Barangay 4, ciudad sang San Carlos.
Suno kay Villasario sang ginpadulungan sang mga kapulisan ang balay sang biktima, nakita sang mga ini ang naguba nga jalousie sang bintana nga gin-agyan sang mga suspek.
Gintaban sang mga suspek ang isa ka tablet nga black nga nagabili sang P25,000 kag isa ka iphone xsmax nga nagabili sang P80,000 kag P10,000 nga cash.
Suno diri, sang nadakpan si Rafols narekober diri ang tablet apang wala makita ang Iphone kag P10,000 nga cash.
Ginahulat nalang sa karun sang mga kapulisan ang complaint batok sa suspek agud nga mapasakaan sang kaso ang mga suspek.
